Header Ads

  • BREAKING



    ரூ. 3,700 கோடி இணையவழி வர்த்தக மோசடி வழக்கு: தனியார் வங்கி அதிகாரி காஜியாபாதில் கைது.

    தேசியத் தலைநகர் வலயப் பகுதியில் ரூ.3,700 கோடிக்கு இணையவழி வர்த்தக முறைகேட்டில் பட்டதாரி வாலிபர்கள் ஈடுபட்ட சம்பவம் தொடர்பாக, காஜியாபாதில் யெஸ் வங்கி அதிகாரி ஒருவர் கைது செய்யப்பட் டுள்ளார்.

    இதுகுறித்து, உத்தரப் பிரதேச சிறப்பு அதிரடிப் படையின் கண்காணிப்பாளர் நாராயண் மிஸ்ரா வியாழக்கிழமை கூறியதாவது:
    யெஸ் வங்கியில் தொழில் தொடர்பு மேலாளராக பணிபுரிந்து வரும் அதுல் மிஸ்ரா, உத்தரப் பிரதேச சிறப்பு அதிரடிப் படையினரால் காஜியாபாதில் புதன்கிழமை கைது செய்யப்பட்டார். இந்நிலையில், நீதிபதி முன்னிலையில் வியாழக்கிழமை ஆஜர்படுத்தப்பட்ட அவருக்கு நீதிமன்றக் காவலில் வைக்க உத்தரவிடப்பட்டது.

    மோசடி நிறுவனத்தின் உரிமையாளர்கள் சுமார் ரூ.1,000 கோடி கருப்புப் பணத்தை பதுக்கி வைக்க அதுல் மிஸ்ரா உதவியுள்ளார். அதற்காக அதிகளவில் அவர் லஞ்சம் பெற்றுள்ளார்.

    அதுல் மிஸ்ரா பணியாற்றி வரும் ராஜ்நகர் யெஸ் வங்கிக் கிளையில், அந்த மோசடி நிறுவனத்துக்கு இரு கணக்குகள் இருந்துள்ளன என்று நாராயண் மிஸ்ரா கூறினார்.

    இந்த இணையவழி வர்த்தக மோசடியின் முக்கியக் குற்றவாளியாக கூறப்படுபவரும், மோசடி நிறுவனத்தின் உரிமையாளரான அபினவ் மிட்டல் ஏற்கெனவே கைது செய்யப்பட்டிருந்த நிலையில், 5 நாள் போலீஸ் காவலில் உள்ளார்.

    பின்னணி: தேசியத் தலைநகர் வலயப் பகுதியில், "ஒரு முறை கிளிக் செய்தார் ரூ.5 பெறலாம்' என்ற விளம்பரத்துடன் அபினவ் மிட்டலின் மோசடி நிறுவனம் பிரபலமடைந்தது. இந்த இணையவழி வர்த்தகத்தில் இணைய, முன்பணம் செலுத்துமாறு வாடிக்கையாளர்கள் கேட்டுக்கொள்ளப்பட்டனர்.

    ஆனால், அந்த நிறுவனம் உரிய பணத்தை தருவதில்லை என்று பலர் புகார் அளித்ததை அடுத்து போலீஸார் மேற்கொண்ட விசாரணையில் ரூ.3,700 கோடி அளவுக்கு அந்த வர்த்தகத்தில் மோசடி நடந்தது தெரியவந்தது.

    இதையடுத்து, இச்சம்பவம் தொடர்பாக லக்னெளவில் உள்ள அமலாக்க இயக்குநரகம் குற்றவியல் வழக்குப் பதிவு செய்து விசாரணை மேற்கொண்டு வருகிறது. அத்துடன், அந்த நிறுவன உரிமையாளருக்கு சொந்தமான பல்வேறு இடங்களில் சோதனை நடத்தப்பட்டதுடன், அவரது சொத்துக்கள் முடக்கப்பட்டுள்ளன.

    கருத்துகள் இல்லை

    Post Bottom Ad